Maori Documents
He aratohu mō te tuku kerēme
He aratohu mō te tuku kerēme (PDF 53 kb)
Mō te tuku kerēme, me waea atu koe ki te nama kore-utu – 0800 362 326 Me tuku rānei i tō kerēme mā te ipurangi.
Kua tukuna e koe he kerēme ki te Kōmihana Rūwhenua. Ka aha i muri i tēnei? He aratohu raupapa upane tēnei ki ngā hātepe mō ngā kerēme whakatau a EQC me te whakautu anō i ngā pātai e ōrite te pātaihia mō ngā rīanga whakakapi a EQC.
I tuku pātai noa iho pea koe ki a EQC me tō whakaaro anō he aha i whakaritea ai tō kōrero pēnei tonu i te kerēme. I pēnei ai kia tuhia me te mōhio anō kei te āta mahia tō kaupapa. Kāore e whai pānga atu ki ō utu me ō kerēme ā tōna wā – kāore a EQC e whai i tētahi hua kēreme-kore.
Te hātepe whakatau kerēme
- Ka tukuna e EQC he reta e āhukahuka ana i tō kerēme. Ka tohua e mātau he māngai hei haere atu ki te kite i te wāhi i tūkinotia me te tuku pūrongo mai, ā, mēnā rānei he iti noa iho te tūkino ki tō kāinga, ki ō rawa rānei, ka tukuna e mātau he pepa hei whakakī māu.
- Ka whakapā atu a EQC ki tō kairīanga ki te pātai atu mēnā kei te whai rīanga tonu koe. I ētahi wā me pātai atu mātau ki a koe kia āwhina mai mō tēnei. Ka tutuki i te wā e whakahaerehia te raupapa upane e whai ake.
- Mēnā e hiahiatia ana, ka tohua e te māngai mō EQC he kaiwāriu rēhita hei wāriu i ngā tūkinotanga. Ka riro anō i a EQC he whakatau tata o ngā utu whakatika.
- Mēnā he tino nui te tūkinotanga, e noho mōrearea rānei i runga i tēnei, ka tonoa he mataaro pūkaha hei pūrongo atu ki a EQC.
- Ina tae katoa atu ki a EQC ngā pārongo mō tō kerēme, ka whakamāramahia atu e tō māngai te whakataunga mō tō kerēme.
- Ina whakaaehia te whakatau, ka utua koe, tō kaipupuri mōkete, te kaiwhakatika rānei e mātau te tapeke, e hāngai ana ki ngā ture o te kirimana.
E hia te roa mō te whakatau i taku kerēme?
Mēnā e māmā ana, ka whakatauhia pea tō kerēme i roto i te kotahi marama. Ka roa ake mēnā ka tonoa he tohunga ki te tuku tohutohu, mēnā i tukuna rānei tō kerēme i te wā o tētahi aituā nui ki roto i Aotearoa.
Moni tāwere
Mō ngā kerēme e pā ana ki tō kāinga, me tō kāinga me ngā rawa o roto rānei, ka utu koe i te $200 tāwere mō ngā kerēme $20,000, iti iho rānei. Mēnā ka nui ake tō kerēme i te $20,000, he kotahi paiheneti o te tōpūtanga te tāwere. Mō ngā kerēme mō ngā rawa o roto noa iho, e $200 te tāwere, ahakoa pēhea te nui o tō kerēme.
He aha ngā kaupapa ka taea e EQC te tuku paremata?
Ka taea e EQC te tuku paremata ki ngā kaikerēme mō te koretanga, te tūkinotanga rānei o te:
- whenua e 8 mita mai i tō whare, i ngā whare rānei o tō kāinga.
- te whenua o te ara kuhunga – atu ki te 60 mita mai i tō whare, i ngā whare rānei o tō kāinga.
Ka taea anō e EQC te utu i ngā hanganga whakakaha, piriti, me ngā waikeri.
Tirohia te Aratohu mō ngā Kainoho Kāinga a EQC, te Ture Kōmihana Rūwhenua rānei mō ētahi atu pārongo āmiki.
E hia te roa mō te whakatau i taku kerēme?
He uaua ki te aromatawai i ngā kerēme mō ngā whenua, pātū pupuri oneone, waikeri me ngā tūkinotanga ki ngā piriti. E toru marama te wā tau toharite mō te whakatau i ngā kerēme. Engari, ka rerekē te wā ake nā runga i te uauatanga o ngā tūkinotanga, me te āhuatanga tonu o te rangi. E ngana ana mātau ki te whakatau i ngā kerēme māmā i roto i te rua marama.
Moni tāwere
Ko te moni tāwere mō ngā kerēme whenua he 10 paiheneti o te whakautaunga kerēme, he $500 te iti iho me te $5,000 te mutunga rawa.
He pēhea te tuku paremata a EQC?
Ka utua e EQC tō whenua i tūkinohia, te hanganga whakakaha, te piriti me te waikeri ki tōna wāriu i te i te wā i tūkinotia, te utu mō te whakatika rānei, ko te mea iti o ēnei.
Pēhea te nui ka utua e EQC?
Ehara te rīanga e whakaratohia e EQC mō te whenua, pātū pupuri oneone, piriti me ngā waikeri i te rīanga whakakapi. Ko te utu mutunga rawa ka utua e EQC ka rite ki te wāriu o te whenua, te pātū pupuri oneone, piriti, waikeri rānei i te wā i tūkinotia rānei. Ka tohua e EQC he kaiwāriu rēhita hei whakarite i te wāriu o tō whenua rīānga.
Ka utua anō e EQC he pātū pupuri oneone hou?
Kāo, engari anō mēnā kei te noho mōrearea tonu tō whare, tō whenua rānei. He here anō ka pā i roto i tēnei momo kerēme motuhake.
Ka utua anō e EQC ki te tiaki i ōku rawa mai i ngā aituā ā tōna wā?
I ētahi wā, whai muri i ngā tohutohu mataaro pūkaha, tērā pea ka taea e EQC te utu i ētahi mahi ki te tiaki i tētahi kāinga whai rīanga, e noho mōrearea tonu ki tētahi tūkinotanga taiao i pā mai. I tua atu i tēnei, kei a koe te kawenga tiaki mō ngā pānga mai ā tōna wā.
Mēnā he āwangawanga āu mō tō kerēme, whakapā ki te māngai mō EQC i te tuatahi, ki te kaiwhakahaere kerēme EQC rānei.
Mēnā kāore e tatū tō raruraru i tēnei hātepe, me whakapā atu koe ki te kaiwhakahaere rīanga o EQC i runga i 0800 652 333.
Mēnā, i muri i tō whakapātanga ki te kaiwhakahaere rīanga, kei te noho āwangawanga tonu koe nā te mea kāore anō kia riro i a koe ngā whakawhiwhinga katoa i raro i te Ture EQC, ka taea e koe te pīra ki te Te Kaitiaki Mana Tangata